ఎంత రమ్యములు యెహోవా

ఎంత రమ్యములు యెహోవా నీ నివాసములు

ఎంత సుందరము యెహోవా నీ గుడారములు || ఎంత ||

నీ మందిరావరణం నే కోరుకున్న వరం

నీ దివ్య బలిపీఠం పిచ్చుకలకు ఆవాసం

కోయిలకు గూటి స్థలం నీదాసుల ఆశ్రయం       ||ఎంత ||

నీ పాద సేవకులు ఇలలో నిరాశ్రయులు

నీ పేద పిచ్చుకలు నీ ఆలయ నివాసులు

నీ ప్రజలకు కనిపించె కోవెలలో కాపరులు       ||ఎంత ||

మరణానికి సంకేతం బలి పీఠమే గదా

ఆ స్థలమే పక్షులను కాపాడే గూడు కదా

శరణార్ధులకది నిరతం స్థావరమై వెలసె గదా       ||ఎంత ||

నీ మందిర నివాసులు నీ బలమొందే ప్రజలు

నిను నమ్ముకొనే జనులు నిజముగ బహు ధన్యులు

నీ గుడారమే శ్రేష్టం నీ ప్రసన్నతే క్షేమం       ||ఎంత ||

నీ దర్శన సౌభాగ్యం నీ సన్నిధి సంతోషం

నా ప్రాణం ఆశించు నా హృదయం కాంక్షించు

నీ భక్తుని దృష్టించుమా అభిషిక్తుని లక్షించుమా       ||ఎంత ||

నీ మందిర ద్వారమున ఒక్క రోజు గడిపిన చాలు

అవినీతి గుడారమున వేయి దినాలకన్న మేలు

నీ దాసుని దృష్టించుమా అభిషిక్తుని లక్షించుమా       ||ఎంత ||