యేసుక్రీస్తు నిజ దేవుడురా

యేసుక్రీస్తు నిజ దేవుడురా - భాసుర ప్రేమ సజీవుడురా,

వాసిగ పరమ నివాసమీడిన - దోషకారుల బంధువురా

దివ్యబోధనిలజాటెనురా - భవ్యపధంబును జూపెనురా,

అవ్యయమగు శ్రీయేసు రాజ్యపు - కావ్య గీతికలు పాడుమురా       ||యేసు ||

సిలువ భారమును మోసెనురా - ఖలుల మనసు నిలమార్చెనురా,

చెలువగ మనకై రక్తము కార్చి - విజయుడై మృతి గెల్చెనురా       ||యేసు ||

భక్తులకిల కనిపించెనురా - ముక్తి దాత పరమేగెనురా,

శక్తి నొసగుటకు పరిశుద్ధాత్ముని - రక్తిమీర భువికంపెనురా       ||యేసు ||

నమ్మినవారికి నెమ్మదిరా - నమ్మని వారికి నరకమురా,

ఇమ్మహి తీర్పును తీర్చుట కొరకై - క్రమ్మర భువికరుదెంచెనురా       ||యేసు ||