ఈ మహిలో శాశ్వతం

ఈ మహిలో శాశ్వతం ఏదీ లేదు సోదరా

ఎందుకింక దీనిపై ఆశ వీడరా ఆశ వీడరా

లోక రక్షణార్ధమై ప్రాణమర్పించిన

క్రీస్తు నందె మోక్ష పురికి దారి కలదురా - 2 || ఈ మహిలో ||

అంతలో కనబడి మాయమౌ ఆవిరి

నీటి బుడగనీదు బ్రతుకు కానరా

ఏ క్షణమో ఈ ఘటం పగిలిపోవు నేస్తం

మరుక్షణమే విడిచెదవు నీకున్న సమస్తం       ||ఈ మహిలో ||

నీట ముంచి లేపిన చేద వెంట జారిన

నీటి బిందువే నీవు ఎరుగరా

త్రాసుమీద ధూళివి తిరిగిరాని వాడివి

లోకమందు కేవలం యాత్రికుడివి       ||ఈ మహిలో ||

ఎగిరిపోవు పొగవలె తరిగిపోవు దినములు

సాలె పురుగు గూడు నీది చూడరా - 2

ఓటికుండ జీవితం దాటిపోవు నీడవు

పరలోకమె (నీ) మనదేశం అదే శాశ్వతం       ||ఈ మహిలో ||